Xeberê Peyênî
Kitabo Elektronîk: Mewlana Ra Hîkayeyî

Kitabo Elektronîk: Mewlana Ra Hîkayeyî

Tîya ra hewt serrî verê cu wendegeh de bi wendekaranê xo saeta wendişî de ma kitap wendênî. A roje mi kitabê xo xo vîr ra kerdibi û nêardibi wendegeh. Coka ez ewnîyawa kitabanê wendekaran ke xo rê yew weçînî, biwanî. Wina zî hem wendekaranê xo rê bibê nimûne hem zî demê xo bi wendiş bivîyarnî. Kitabê ke mi wendekaran rê girewtibî înan ra kitabê “Mewlana Ra Hîkayeyî” mi vet û dest bi wendişî kerd. Mi wexto ke çend rîpelî wendî, kitab zaf weşê min a şi. Mi xo xo vat dê ez biewnî ez eşkena nê cumleyan biçarnî zazakî. A hele mi bineyke ceribna. Ez ewnîyaya ke ez ker ra yena,  mi xo xo va, qey ti no kitab nêçarnenê kirdkî.

Mi o kitab girewt û berd keye. Keye de ser o xebitîyaya. Tabî o wext nuştişê mi hema sey nikayî nîyo. Xeylêk xetayê mi vejîyenê. Mi zî goreyê fekê Çewlîgî çarnayênî û dima çeku bi çeku ewnîyayênî ferhengê Vateyî ra. Mi çend hîkayeyan çarna. La ancî ez xora bawer nîya. O wext mi va ez hewî seba redaktekerdiş şaîro erjaye Merdimînî ra persî, gelo zaf xeletî estê. Mi ci rê telefon kerd, persa. Ey zî bi zerrweşî qebul kerd. Va, yew hewe de nêbeno. Pira pira ma ser o bixebît hîna baş beno.

Mi çarnayîşê xo yê verênî ci rê şawit. Roja bîne mi rê nuşte apey şawit û cayê ke goreyê raştnuştişî bedilnayî bi rengo sûr nîşan kerdibî. Tabî sûrkerdişê çekuyan dima ez reyna ewnîyayêne kitabanê ferheng û rastnuştişê kirdkî ya. Wina di, hîrê rojan de hewî hîkayeyêk ma çarnayêne. Ez çi zûr vajî vernî de xeylê çekuyî bi rengo sûr neqîşîyabî. Dima pira pira rengê sûrî bîyî tay. Cayê nêkewtênî mi hîş, mi ci rê telefon kerdênî û mi vatênî tîya qey wina yo û ey zî bi feknermî mi rê îzeh kerdênî. Axir, çarnayîşê kitabî qedîya. Bi sayeyê mamosta Merdimînî mi xeylê xo aver berd. Mi rê bi sey yew mamosta.

Eynî wina mi xeylêk sereyê mamosta Roşan Lezgînî zî dejnayo. Tabî tîya de kirdkî de mamostayê min o verên Mehmûd Nêşite zî xo vîr ra nêkerî. Maşallah, çi nuştoxê kirdkî estê, hetê mi kerdê! 🙂

Mîyanê nê xatirayan de ez şîya dersa verênê ya masterê kurdkî. Mamosta Remezan Alanî wina vatbi: Edebîyatê kurdan, edebîyatê roşnvîran o. A roje na cumle mi rê zaf xerîb amebî. La nika ez bi tecrube fehm kena ke raşt a zî edebîyatê ma edebîyatê roşnvîran o. Înşallah roşnvîrê ma zêdîyenê. Şarê ma zî qedrê înan hîna baş zaneno.

Tabî tîya de wina rexne zî do bêrê: Qey to fariskî ra ney tirkî ra açarnayo? To kerda awe ya awa goştî. Mi dest ra no ame. O zî hinî keweno barê fariskîzanayoxan.

Bi hêvîya rojanê weşan, kitabo ke mi bi paştdayîşê Merdimînî tirkî ra çarnayo kirdkî pêşkêşê şima kena.

Şîroveyî qefelîyaye yî

Scroll To Top
Pêro heqê na sîteyî ayê www.kirdki.com'ê. Na sîte pê çîynermê komputure ye azad ra virazîyaya. Seba têkilîya infokirdki@gmail.com - Web Dizayn: Yo-Ten
olympick.co.kr . bstopclassanma.com . bada77.com . Slot Online Resmi Terpercaya . pogba88.com