Zebeşa 20 kiloyî ha hîre pûnetî ra roşîyena

Ozkan Begîç, dewa Xerîbî de nişeno ro. Hêgayê xo yo ke 60 donim o, pêroyê ey kerdo zebeşe. Na serre, goreyê serranê bînan hîna zaf mehsuldar bi. Begîç, hêgayê xo ra 60 ton zebeşe girewt. Na hewe zî kewto derdê rotişê nê zebeşan. Begîç va: “Semedê vîyertişê wextê zebeşî ya ma nêeşkenî mehsulê xo biroşi. Semedê ronayîşê zebeşî  ya zî nêzdîyê 20 hezar pere, ma xerc kerd. Nika zî ma nêeşkenî mehsulê xo biroşi. Nê wextan de zî çew zebeşe nêgeno. Ma nêeşkenî zebeşê xo ber teber zî.” Begîç wina dewam kerd: “ Hêgayê ma yo ke dewa Xerîbî de yo, her serre keyeyê ma ra 10 tenî tede zebeşe ramênî. Nê 10 tenî zî pê mehsulê nê hêgayî îdareyê xo kenî. Zebeşî zafane aşma Hezîrane, Temmuze û Tebaxe de vejîyenî û yenî bazar. Labelê Çewlîg de ridê mewsimî ra ancax aşma Tebaxe û Êlule de vejîyeno. No rid ra zî rotiş de ma zaf zehmet ancênî. Hêgayê 60 doniman ra ma 60 ton zebeşe girewt. Semedê nê zî nêzdîyê 20 hezar pere ma xerc kerd. Ma no bostan ra nêzdîyê 30 hezarî qezenc kenî. Hesabanê ma gore; gera ma zebeşa 20 kiloyî 10 pûnet ra biroşi. Labelê semedo ke mesrefê ma vejîyo ma na zebeşî 3 punetî ra roşênî. Semedo ke zebeşî nêroşîyênî, ez zî mehla mehla(taxe), kuçe kuçe gêrena û heba zebeşî 2 yan zî 3 pûnetî ra roşena