Kirdkî.com Xirbanê xo ra bigêrîn, şênayîyê şarî ra megêrîn
Seyîdxan Kurij – Botrop
Mikaîl Aslan, Zonî ma șarî ma keyeyanî xo ra eșto teber, ma wazenî pencira ra, lojine ra ancî zere kuwemî.
Hunermend Mikaîl Aslan, Cemîl Qoçgirî û Kamer Söylemez hîrê așmêyo ke welatanî Ewropa Almanya, Fransa, Swîsre û Avusturya de çalakîyanî hûneri virazenî. Nê çalakîyî bi ardimî komel, dezgeh û rêxistinanî kurdan yenî organîze kerdiș.
Nê çalakîyan ra yew 05.05.2013 de bajarî Almanya Bottrop de virazîyayî. Na çalakî bi nameyî “Naskerdiș dayêni kîtab û albûman û sohbet” bi ardimî komela Hevaltî bîy.
Konsera verî serekî Hevaltî Fetah Tîmar û șaîr Kamer Söylemez derheqî armancê na çalakî de agahdarî da hedreyan.
Fetah Tîmar behsê halî kurdanî dîaspora kerd û ehemîyetî wahar vecîyayișî ziwan û kulturî sero vindert. Semedo ke 4î așmê Gulan serserrê 76. yê terteleyî Dêrsîmî bîy, Fetah Tîmar terteleyî Dêrsim sero zî çend qalî vayî.
Mîkail Aslan zî xebatê xo yê muzîk sero û xebatê embazanî xo sero qisê kerd. Dima Mîkaîl Aslan û Cemîl Qoçgirî klamî xo yê kurmancî û zazakî pêșkeș goșdaran kerdî. Zafê klaman goșdaran bi hûnermendan a pîya vayî. Kamer Söylemez zî bi muzîkî hunermendan șîîrî xo yê kirdkî peșkeș kerdî. Ancî hunermandan tîya de albûmî xo û pirtûkî xo zî dayî sinasnayiș.
Na konser tenya sey yew konsera klasîk yê muzîk nêbîy, çunke tîya de bi kesanî goșdarana sohbet zî bi. Goșdaran hunermendan ra persî pers kerdî û karûbarî înan sero, muzîkî înan sero vînayeyî xo ardî ziwan.
Na çalakî de nê albûm û kîtabî ameyî sinasnayiș:
Albûmî Cemîl Qoçgirî – Hîva Zerî
Kîtabî Kamer Söylemez – Peya, Lawika Memikê Kulavî –
Kîtabî Mîkail Aslan, Mikail Aslan – Repertuar – Kılamê Çemi
Ma konsera pey Mîkail Aslan de derheqî armancê no projeyî de qisêkerd. Mîkail Aslan armancê no projeyî îna ard ziwan, “ ma hîrê așmêyo fetilime, ma bi ardimî komel û dezgeyanî ma șonî ortê șarî ma, ortê cemaatî ma. Cemaat șenik bo yan zî zêd bo, ma rê ferq nêkeno. Çunke ma wazenî senatî xo bero veri keberanî șarî xo, verî berî șarî xo, komelanî xo. Cemaatanî șenikan de zaf rey sohbet hîna beno xori, muhabet hîna beno xori. Zonî ma șarî ma keyeyanî xo ra eșto teber, ma wazenî pencira ra, lojine ra ancî zere kuwemî.
Yew felsefeyî ma zî no yo ke ganî senatkar șoro orteyî șarî, orteyî qomî. Ganî senatkar nêpawo ke șar bîyero leweyî senatkar. No ridra ma wazenî șimi orteyî qomî xo, înan de sohbet bikerimi, pers bikerimi ê se vanî, ma ra çi wazenî, karûbarî ma sero çi fikirênî. Nê cemaatan de ma yew bîn ra zaf çî musenî. Tayê cesaret nêkenî orteyî cemaat de qisêbikerî, la yenî pê de ma de qisêkenî. No proje zaf yew çîko rind o”.
No projeyî Mîkail Aslan û embazanî ey hetanî așmê hezîran birûmo, çalakîya peyên 9î hezîran de Hamburg de virazîyena.
